Ҳамасола ба муносибати зодрӯзи сардафтари адабиёти муосири тоҷик Устод Садриддин Айнӣ конференсияву ҳамоишҳои илмӣ дар донишгоҳҳову донишкадаҳои кишвар баргузор мегарданд. Дар таърихи 13-уми апрел бо ташаббуси кафедраи услубшиносӣ ва таҳрири адабии факултети журналистика конференсияи ҷумҳуриявии илмӣ-амалии “Устод Садриддин Айнӣ ва асолати забони тоҷикӣ” бахшида ба 140-солагии Садриддин Айнӣ доир гашт.

Ҳамасола 10-уми апрел дар кишварамон Рӯзи радио таҷлил мегардад. Имрӯз низ дар факултети журналистика бахшида ба 88-солагии Радиои Тоҷикистон маҳфили идона бо иштироки муовини аввали директори Радиои Тоҷикистон, Обидҷон Саидзода баргузор гардид. Дар маҳфил устодону донишҷӯён иштирок доштанд. Дар оғоз декани факултет, дотсент Исматов С. суханронӣ намуда, аз муносибат ва ҳамкории радио бо факултет изҳори сипос намуд. Сипас Обидҷон Саидзода нахустин рисолаи худ «Умре бо радио»-ро ба донишҷӯён муаррифӣ кард, ки ин китоб бахшида ба рӯзи радио нашр шудааст. Дар китоб ҳаёт ва фаъолияти яке аз собиқадорони Радиои Тоҷикистон Ҳалима Насибулина дарҷ гардидааст, ки умри хешро ба радио бахшида буд. Ин китоб бо матолиби матбуот ва бойгонӣ ороста шуда, барои доираи васеи хонандагон, махсусан барои муҳаққиқони театр, синамо ва донишҷӯёни факултету шуъбаҳои журналистика пешбинӣ шудааст. Дар рафти маҳфил наворе дар хусуси кору зиндагӣ ва эҷоди Ҳалима Насибулина ба донишҷӯён нишон дода шуд.

Баъдан муовини директори Радиои Тоҷикистон Обидҷон Саидзода аз гузашта ва имрӯзи радио маълумот доданд, ки радиои тоҷик чӣ мушкилиҳоро аз сар гузаронида ва то кадом дараҷа ба комёбӣ ноил гаштааст. Яъне радиои тоҷик дар фазои иттилоотии Тоҷикистон мавқеи бузургро соҳиб гашта, дар рушду нумӯъ ва пешрафти давлат нақши арзанда гузоштааст.

Маҳфил бо саволу ҷавоб ва муколамаи донишҷӯён бо меҳмон хотима ёфт.

Умедҷони Каримхон

донишҷӯи соли сеюм